Fróðleikur um friðlýst svæði
Teigarhorn í Berufirði.
Teigarhorn er einn þekktasti fundarstaður geislasteina (zeólíta) í heimi. Flest stærri söfn munu eiga eintök þaðan. Friðlýst 1975. Geislasteinarnir eru í klettum og sjávarhömrum á Teigarhorni og veðrast fram öðru hverju. Óviðkomandi er óheimilt að hrófla við jarðmyndunum. Teigarhorn er þekktast fyrir geislasteinategundirnar skólesít, stilbít, epistilbít, analsím og heulandít.
Breskur jarðfræðingur að nafni G.P.L. Walker rannsakaði geislasteina og aðrar holufyllingar á Austurlandi og kortlagði dreifingu þeirra. Walker sýndi fram á að ólíkar gerðir geislasteina raða sér í sem næst lárétt belti og er fjarlægð þeirra mismunandi frá upphaflegu yfirborði landsins. Rannsóknir Walkers á Austfjörðum hafa m.a. leitt í ljós að talið er að um 1500 m hafi rofist ofan af blágrýtismynduninni og landið risið vegna flotjafnvægis. Þessar aðstæður hafa leitt til þess að holufyllingar sem mynduðust djúpt í jörðu hafa komið í ljós á yfirborði.
Geislasteinar eða zeólítar eru mjög algengir sem holufyllingar í bergi hér á landi og er Ísland þekkt á alþjóðavísu fyrir geislasteina. Geislasteinar eru jafnan hvítir eða glærir að lit en stundum litaðir af aðkomuefnum. Geislasteinar eru natríum, kalíum og/eða kalsíum- álsiliköt og innihalda laust bundið vatn. Alþjóðaheitið zeolit er grískt að uppruna (zeo-líþos) og þýðir suðusteinn, en við glæðingu geislasteina sjóða þeir eða freyða.
Geislasteinar (zeólítar) eru stundum greindir eftir lögun þ.e. eftir því hvort þeir eru geislóttir (stöngullaga), plötulaga (blaðlaga) eða kubbalaga (teningslaga). Skólesít er dæmi um geislótta lögun, heulandít um plötulaga kristalla og kabasít er dæmi um kubbalaga lögun. Kristallagerð geislasteina er fjölbreytileg og eru um 20 tegundir þekktar hér á landi. Greining geislasteina til tegundar eftir útliti getur verið erfið þar sem kristalformið er líkt og kristallar oft svo fíngerðir að nauðsynlegt er að greina þá í smásjá.
Weyvadt hús á Teigarhorni er friðlýst ásamt upphaflegu innbúi samkvæmt þjóðminjalögum. Húsið sem er afar veglegt lét Níels Weyvadt kaupmaður byggja á árunum 1880-81. Sérstaða hússins sem er undir dönskum áhrifum byggir m.a. á því að útveggir og þak var upphaflega klætt pappa en það var afar fátítt hér á landi á byggingartíma hússins. Undir húsinu er steinhlaðinn kjallari, portbyggð hæð ofan á jarðhæðinni og geymsluloft í risi. Grunnflötur hússins er um 65 fermetrar. Þjóðminjasafn Íslands tók við vörslu hússins árið 1992, en búið var í húsinu fram til ársins 1988 eða í rúm 100 ár. Niels Peter Emil Weyvadt (1814-1883) verslunarmaður við Djúpavog átti fjölda barna og næstelst þeirra var Nicoline (1848-1921). Hún var fyrst íslenskra kvenna sem lærði ljósmyndun en jafnframt kynnti hún sér steinafræði. Áhugi Nicoline á steinafræði hefur vafalítið verið vegna fjölbreytileika og fjölda geislasteina á Teigarhorni.
Nicoline tók við búinu á Teigarhorni eftir föður sinn og sinnti jafnframt ljósmyndun og til þess að starfa við iðn sína lét hún reisa ljósmyndaskúr við húsið. Nicoline Weyvadt var talin einn snjallasti ljósmyndari landsins, en plötusafn hennar er varðveitt á Þjóðminjasafni Íslands.
Hansína Regína Björnsdóttir (1884-1973) fósturdóttir og frænka Nicoline lærði ljósmyndun hjá henni og tók við búinu á Teigarhorni.
Teigarhorn er rétt hjá Djúpavogi við þjóðveg 1.
Landeigendur hafa þar opið steinasafn og taka á móti gestum. Á Teigarhorni er sögð saga steinatöku og steinasölu síðustu árhundruðin og þar er að finna ýmsan fróðleik um myndun zeolita, gerðir þeirra og útlit. Landeigendur fara einnig með hópa í skoðunarferðir um fjöruna þar sem hægt er að sjá þessa stórkostlegu náttúrusmíð.
Silfurberg er ekki geislasteinn heldur kalkspat sem er ein algengasta holufyllingin hér á landi. Þekktustu fundarstaðir silfurbergs hér á landi eru námurnar við Helgustaði í Reyðarfirði, friðlýst náttúruvætti árið 1975, og við Hoffell í Hornafirði.
