Efnavörueftirlit
Árið 2010 vann samstarfshópur Umhverfisstofnunar og heilbrigðiseftirlits sveitarfélaga (HES) að verkefninu Samræming efnavörueftirlits - gerð handbókar og vefgáttar fyrir gagnaskil . Meginmarkmið verkefnisins var að samræma efnavörueftirlit á landinu með því að fræða eftirlitsaðila og stuðla þannig að samskonar eftirliti um allt land. Afurð verkefnisins var handbók um efnavörueftirlit sem var gefin út á rafrænu formi í október 2010 og vefgátt fyrir gagnaskil sem var tekin í notkun í febrúar 2011.
Handbókin á að vera leiðbeiningarrit fyrir heilbrigðisfulltrúa við eftirlit með efnavörum og stuðla þannig að samræmdu efnavörueftirliti í landinu. Einnig er handbókinni ætlað að vera fræðsluefni fyrir nýja heilbrigðisfulltrúa. Í henni er að finna á einum stað fróðleik, leiðbeiningar og verklagsreglur um efnavörueftirlit.
Markmiðið með vefgáttinni er að búa til upplýsingaveitu um efnavörueftirlit og safna þar á einn stað upplýsingum um eftirlit með efnavörum á Íslandi. Þar eiga heilbrigðisfulltrúar á öllu landinu að skrá upplýsingar um niðurstöður efnavörueftirlits í gagnabanka. Vefgáttin er einnig lokaður samskiptavettvangur fyrir eftirlitsaðila og þar er hægt að nálgast upplýsingar um eftirlit frá öðrum HES-svæðum. Gagnabankinn nýtist síðan Umhverfisstofnun við að taka saman upplýsingar um eftirlit með efnavörum sem senda skal til ESA.
