Svanurinn

Ríkisstjórnin samþykkti í lok mars 2009 stefnu um vistvæn innkaup ríkisins. Með skýrum kröfum um umhverfissjónarmið stuðlar ríkið að því að markaðurinn bjóði fram nýja og betri valkosti til að mæta kröfum um minna álag á umhverfið.

Opinber fyrirtæki og stofnanir eru atkvæðamiklir innkaupa aðilar og því ættu mörg fyrirtæki að sjá hag sinn í því að geta boðið upp á vöru eða þjónustu sem samræmist vistvænni innkaupastefnu ríkisins. Ekki er nauðsynlegt að vera með Svansvottun í þessu samhengi en til þess að standast strangar kröfur innkaupastefnunnar þurfa fyrirtæki að uppfylla ítarlegar kröfur um lágmörkun þeirra umhverfisáhrifa sem hljótast af framleiðslu vörunnar eða af þjónustunni. Jafnframt þarf að leggja fram skjöl þessu til sönnunar. Þeir sem hafa hlotið Svansmerkið þurfa í flestum tilfellum ekki að leggja fram neitt aukalega, því Svansvottun tryggir að fram hafi farið nákvæm úttekt á öllum þeim umhverfisþáttum sem koma við sögu. Einfaldasta leiðin til að uppfylla umhverfisskilyrði sem sett eru fram í opinberum útboðum skv. vistvænum innkaupum er því að vera með vöru sína eða þjónustu Svansvottaða.

Vertu skrefinu á undan, fáðu Svansvottun á þína vöru eða þjónustu og bættu þar með rekstrargrundvöll þíns fyrirtækis.