Kostnaður
Svanurinn er ekki rekinn í hagnaðarskyni
Rekstur Svansins er að hluta fjármagnaður með opinberum fjárframlögum í gegnum rekstur Umhverfisstofnunar og að hluta með gjöldum sem innheimt eru fyrir umsóknir um og notkun á Svansmerkinu. Fyrirtæki sem hafa leyfi til að nota Svaninn á tiltekna vöru eða þjónustu sem seld er á Íslandi greiða gjald samkvæmt gjaldskrá Svansins, sjá nánar neðar. Íslenskir leyfishafar Svansins sem flytja út vöru til hinna Norðurlandanna greiða að sama skapi gjald til Svansins í viðkomandi löndum.
Gjöld vegna Svansins tengjast þróun á viðmiðum, umsóknarumsýslu og kynningarmálum. Svanurinn er ekki rekinn í hagnaðarskyni, en rekstrinum fylgir þó ýmis kostnaður.
Kostnaður tengist í megindráttum eftirfarandi þáttum:
- Þróun á viðmiðunarreglum. Að þróa kröfur fyrir hvern vöruflokk er nákvæmnisvinna sem tekur tíma og verður að vinna afar vel. Það tekur um þrjú til fjögur ár að móta kröfur fyrir nýjan vöruflokk.
- Umsýsla vegna umsókna og eftirlits með vörum/þjónustu. Þegar fyrirtæki sækir um leyfi til að nota Svaninn tekur það að jafnaði um þrjár vinnuvikur að ganga úr skugga um að allar upplýsingar frá fyrirtækinu standist.
- Mikilvægt er að veita upplýsingar og kynna umhverfismerkið Svaninn fyrir neytendum, framleiðendum, innflytjendum og söluaðilum. Kynningarherferðir og önnur markaðssetning miðar að því að kynna Svaninn og auka sölu á Svansmerktum vörum og þjónustu.
Kostnaður þinn felst í umsóknargjaldi og árgjaldi
Gjöld vegna Svansins eru greidd til Umhverfisstofnunnar, umsjónaraðila Svansins á Íslandi. Umsóknargjald er greitt samhliða umsókn um Svansmerkið og nemur það 300 þúsund krónum. Lítil fyrirtæki greiða lægra umsóknargjald eða 150 þúsund krónur en lítil fyrirtæki teljast þau sem eru með 10 starfsmenn eða færri og heildarveltu undir 200 milljónum króna.
Árgjald er skilgreint eftir því hvort um ræðir Svanvottaða vöru eða Svansvottaða þjónustu. Vegna Svansvottaðrar vöru er greitt árgjald sem samsvarar 0,3% af ársveltu vörunnar en vegna Svansvottaðrar þjónustu samsvarar árgjaldið yfirleitt um 0,15% af ársveltu þjónustunnar. Árgjald vegna Svansvottunar er að lágmarki 50 þúsund krónur, en hámarksárgjald er mismunandi eftir vöru og þjónustuflokkum. Nánari upplýsingar eru að finna í gjaldskrá Svansins.
