Kolmónoxíð

Bæði bensínvélar og dísilvélar gefa frá sér heilsuskaðleg efni. Magn þessara efna er háð stærð vélarinnar, snúningshraða, álagi, ástandi vélarinnar, gerð eldsneytis, ofl. Kolmónoxíð eða kolsýrlingur, er það efni í útblæstri bifreiða sem er hvað hættulegast. Meira er af því í útblæstri bensínvéla en dísilvéla, en það er alltaf fyrir hendi í einhverju magni þar sem mengun er af bílum.

Kolmónoxíð er litlaus lofttegund án lyktar eða bragðs og nokkuð léttari en loft. Það myndast við ófullkominn bruna eldsneytis.

Skaðleg árhif kolmónoxíðs felast í því að það dregur úr hæfni blóðsins til að flytja súrefni. Innöndun mikils magns af efninu getur leitt til höfuðverks, svima, truflana á sjón og heyrn. Í verstu tilfellum veldur innöndun kolmónoxíðs yfirliði og dauða. Langvarandi dvöl í kolmónoxíðmenguðu lofti getur leitt til aukinnar hættu á hjarta- og æðasjúkdómum þrátt fyrir að mengunin sé ekki mikil.