Fossvogsbakkar, Reykjavík
Fossvogsbakkar voru friðlýstir sem náttúruvætti árið 1999. Fossvogslögin finnast á um 2 km langri strandlínu í 3-5 m háum sjávarhömrum. Setið hvílir á jökulrákuðu Reykjavíkurgrágrýti og er sambland af þremur lögum úr sjávarseti með steingervingum, sem einnig innihalda jökulættað efni, og nokkrum leirsteinslögum sem innihalda grófara efni.
Í Fossvogsbökkum sést ferli þar sem jökullinn hefur hörfað inn fyrir núverandi strönd, sjórinn hefur gengið á land og setmyndun hafist. Í setinu má sjá merki um tímabundna framrás jökulsins á Alleröd, jökulbráðnun með tilheyrandi setmyndun, sjávarföll og ýmis set og rofferli sem hafa verið virk í strandumhverfi.
Undir lok níunda áratugarins komu fyrstu C14 aldursgreiningarnar á skeljum úr Fossvogslögunum. Þær sýndu að sjávarsetið hafði sest til á tiltölulega skömmum tíma (hámark um 500 ár), leiðréttur C14 aldur 11000 ár. Niðurstöðurnar leiddu til endurtúlkunar á sögu jökulhörfunar og sýndi að síðasta jökultungan á Reykjavíkursvæðinu var frá Yngra Drýas.
Hæstu strandlínur á svæðinu eru í Öskjuhlíð í 43 metra hæð yfir núverandi sjávarmáli en þær mynduðust fyrir um 10 þúsund árum þegar jöklar gengu fram dali og í sjó fram á svæðinu.
Setlögin veita innsýn í hvaða aðstæður ríktu á svæðinu og hvernig umhverfið þróaðist undir lok síðustu ísaldar. Fossvogslögin eru mikilvæg fyrir sögu jökulhörfunar á Íslandi. Fossvogslögin hafa einnig mjög mikið þekkingarsögulegt gildi þar sem rannsóknir á þeim sýna hvernig ný gögn og nýjar rannsóknaraðferðir geta leitt til róttækrar endurskoðunar á áður almennt viðurkenndum kenningum.
Stærð náttúruvættisins er 17,8 ha.
