Fréttir

Að sækja um hreindýraveiðileyfi

Umhverfisstofnunar auglýsir til sölu leyfi til hreindýraveiða á komandi veiðitíma árið 2012.

• Tarfar: 15. júlí til 15. sept. 
• Kýr: 1. ágúst til 20. sept.. 

Umsóknarfrestur er til og með 15. febrúar 2012. Rafrænar umsóknir á skilavef veiðikorta og umsóknir í tölvupósti skulu berast fyrir kl. 24:00 og skriflegar umsóknir að hafa póststimpil 15.02.12 eða fyrr. Við fyrstu úthlutun geta veiðimenn sótt um tvö leyfi, ein aðalumsókn og önnur varaumsókn. Dregið verður úr innsendum umsóknum ef umsóknir eru fleiri en leyfi.

Það nýnæmi er á gjaldskránni að sama veiðileyfisgjald er á öllum svæðum. Veiðileyfi á tarfa kostar á öllum svæðum 135.000 krónur og veiðileyfi á kýr á öllum svæðum kostar 80.000 kr.

Ekki er heimilt að fella hreinkálfa tímabilið 2012.

Samkvæmt reglugerð þá skal greiða 25% af gjaldinu fyrir 1. apríl og 75% fyrir 1. júlí.

Rafrænar umsóknir

Sérstök athygli skal vakin á því að tekið er á móti umsóknum á skilavef veiðistjórnunarsviðs um leið og veiðiskýrslu síðasta árs er skilað og sótt er um nýtt veiðikort og eru menn hvattir til að sækja þannig um. Allir handhafar veiðikorta fá send lykilorð fyrir skilavef á næstu dögum. Byrjað er að senda út lykilorð með tölvupósti. Ekki er tekið á móti umsóknum í síma.

• Skilavefur fyrir veiðiskýrslur og umsóknir um hreindýraveiðileyfi.

Skriflegar umsóknir

Skriflegar umsóknir sendist til:

Umhverfisstofnunar
Pósthólf 174
700 Egilsstöðum.

Umsækjendur sendi inn

• Nafn
• Kennitölu
• Heimilisfang
• Netfang
• Símanúmer
• Númer á veiðikorti
• Einnig komi fram óskir um veiðisvæði og kyn dýrs 

Hægt er að sækja um veiðileyfi með tölvupósti netfang:hreindyr@hreindyr.is

Ekki er tekið á móti umsóknum í síma.

Nánari upplýsingar gefur starfsmaður Umhverfisstofnunar á netfanginun hreindyr@hreindyr.is eða í síma 591-2115 mánudaga til föstudaga milli kl. 9:00 og 12:00

Umhverfisstofnun sér um sölu hreindýraveiðileyfa. Umhverfisstofnun tekur við umsóknum um hreindýraveiðileyfi frá janúar til og með 15. febrúar ár hvert.

Tekið er við umsóknum ýmist gegnum skilavef Umhverfisstofnunar, bréfi eða tölvupósti á hreindyr@hreindyr.is. Í umsókn þarf að koma fram kennitala umsækjanda, heimilisfang og símanúmer. Þá þarf að koma fram á hvaða veiðisvæði umsækjandi sækir um og hvaða kyn.

Sótt er um í aðalval en einnig er hægt að sækja um til vara á öðru svæði eða annað kyn eða annað svæði og annað kyn. Þá er einnig hægt að sækja um eitt aukadýr.

Til að umsókn teljist gild þarf umsækjandi að vera veiðikorthafi, þ.e. hafa verið stofnaður í viðskiptamannaskrá veiðikorthafa. Veiðikort umsækjanda þarf hins vegar ekki að vera í gildi við umsókn eða þegar dregið er. Á veiðikorti þarf að vera heimild til hreindýraveiða en til að fá þá heimild inn á kortið þarf viðkomandi að hafa skotvopnaleyfi með B-réttindum eða sambærileg réttindi. Upplýsingum um B-skotvopnaréttindi þarf að koma til Umhverfisstofnunar.

Að umsóknarfresti liðnum er farið yfir umsóknir og ógildar umsóknir teknar frá.

Þegar endanlegur umsóknarlisti liggur fyrir í gagnagrunni fá allar gildar umsóknir slembitölu frá 1-100.000. Sú aðgerð er framkvæmd af starfsmanni Umhverfisstofnunar að viðstöddum lögfræðingi Umhverfisstofnunar. Þessar slembitölur ráða svo hvar í röð umsókn lendir. Lægsta slembitala fær fyrsta dýr.

Umsóknum er svo raðað eftir slembitölunum á opnum fundi sem leitast er eftir að varpa á netinu. Þá er hverjum flokki raðað fyrir sig, þ.e. eftir svæði og kyni.

a. Ef fleiri umsóknir eru en dýr í boði í flokki lenda þeir sem ekki fá úthlutað dýri í biðröð. Slembitölurnar segja til um hvar í biðröð viðkomandi lendir.

b. Ef færri umsóknir eru en dýr í boði í einhverjum flokki verða skoðaðar varaumsóknir í flokknum. Varaumsóknum verður úthlutað eftir reglum um óhappalista og eftir það ræður slembitala röðinni á varaumsóknunum. Tæmist listi varaumsókna verður úthlutað aukadýrum eftir sömu reglum.

Útdráttur hvers árs er einstakur og óháður fyrri árum.

Að útdrætti loknum fá allir umsækjendur senda tilkynningu um hvort þeir hafi fengið dýr eða ekki. Hafi viðkomandi ekki fengið dýr fær hann í tilkynningunni upplýsingar um númer hvað í biðröð hann er.

Gjald fyrir veiðileyfið er tvískipt og greiðist fjórðungur sem staðfestingargjald eigi síðar en 31. Mars. . ¼ af heildariðgjaldi veiðleyfis er ekki endurgreiddur. Greiði leyfishafi ekki gjaldið fyrir 1. apríl er leyfi hans úthlutað til fyrsta umsækjanda á biðlista eða fyrsta manni á fimm skipta lista eftir atvikum (sjá neðar).

Lokagreiðslu þarf svo að greiða eigi síðar en 30. júní. Greiði leyfishafi ekki fyrir lok dags 30. júní er leyfi hans úthlutað til fyrsta umsækjanda á biðlista eða fyrsta manni á fimm skipta lista eftir atvikum (sjá neðar).

Ef biðlisti klárast á einhverju svæði er skoðað hvort einhverjir hafi sótt um í þann flokk í varaumsókn. Ef einhverjir reynast hafa sótt um það en ekki fengið dýr eftir aðalumsókn er þeim umsóknum raðað eftir slembitölunni og þeim með lægsta númer boðið dýrið fyrstum. Klárist listi varaumsókna er litið til hvort einhverir hafi sótt um í þann flokk sem aukadýr.

Hyggist veiðimaður ekki nýta veiðileyfi sem hann hefur að fullu greitt endurgreiðir Umhverfisstofnun 75% gjaldsins takist Umhverfisstofnun að endurselja leyfið.

Fimm skipta reglan

Þar sem útdráttur hvers árs er óháður útdráttum fyrri ára getur sú staða komið upp að einhverjir einstaklingar fá ekki dýr mörg ár í röð.  Til að mæta því eru þeir einstaklingar sem ekki hafa fengið úthlutað leyfi síðustu 5 umsóknir,  teknir fram fyrir biðröð á því svæði sem þeir sóttu um veiðileyfi á.

Framkvæmd

• Listi yfir þá sem, ekki hafa fengið úthlutað veiðileyfi síðustu 5 umsóknir, og sækja um, er fenginn úr gagnagrunni og fjöldi birtur áður en dregið er. Talning byrjar árið 2003.
• Ekki telst sem úthlutun hafi viðkomandi verið boðið dýr eftir að veiðitímabil hefst nema viðkomandi hafi þegið leyfið og náð dýri
• Þeir sem eru á listanum og hafa sótt um, verði með í útdrætti jafnir öðrum og hafi því jafna möguleika á því að verða dregnir út. 
• Þegar óstaðfestum eða innskiluðum veiðileyfum verður endurúthlutað verða þeir sem ekki fengu úthlutun 6. skiptið í röð í aðalútdrætti teknir fram fyrir biðröð á því svæði og kyni sem þeir sóttu um.
• Ef til kemur að úthluta varadýrum verður skoðað hvort þeir sem á listanum eru hafi sótt um það kyn á því svæði sem aradýr. Sé svo verða þeir teknir fram fyrir þann lista eftir sömu reglum og gildir um biðraðarúthlutun.
• Allar gildar umsóknir teljast með óháð því hvort viðkomandi  hafi sótt um árlega eða með hléum.
• Ef fleiri en einn eru á sama svæði með jafnmörg ár óúthlutað gengur sá fyrir sem lægri slembitölu hefur.
• Ef fleiri en einn  eru á sama svæði gengur sá fyrir sem hefur fleiri ár óúthlutað.
• Sæki veiðimaður sem er á listanum ekki um dýr færist hann á listann árið eftir.

Umhverfisráðherra skipar 4 menn í hreindýraráð til fjögurra ára í senn. Umhverfisráðherra skipar einn án tilnefningar, og er hann formaður hreindýraráðs. Búnaðarsamband Austurlands og Búnaðarsamband Austur-Skaftafellssýslu tilnefna einn fulltrúa hvort og sveitarfélög á veiðisvæði hreindýra einn fulltrúa. Verði atkvæði jöfn á fundum ráðsins ræður atkvæði formanns.

Hlutverk Hreindýraráðs:

• að vera umhverfisráðherra og Umhverfisstofnun til ráðgjafar um vernd, veiðar og nýtingu hreindýrastofnsins, þar á meðal um skiptingu arðs,
• að gera ár hvert tillögu til Umhverfisstofnunar um skilgreiningu ágangssvæða hreindýra, árlegan veiðikvóta og skiptingu hans milli veiðisvæða.
• að gera tillögu til umhverfisráðherra um reglugerð um skiptingu arðs sbr. 4. tl. 3. gr.

Hlutverk ráðsins er að vera Umhverfisstofnun og umhverfisráðherra til ráðgjafar um vernd, veiðar og nýtingu hreindýrastofnsins.Fulltrúum Náttúrustofu Austurlands og Náttúrufræðistofnunar Íslands er heimilt að sitja fundi hreindýraráðs og hafa þar málfrelsi og tillögurétt. 

Um vanhæfi þeirra sem sitja í hreindýraráði gilda vanhæfisreglur sveitarstjórnarlaga, sbr. 19. gr. laga nr. 45/1998.

Hreindýraráð skipa

Hákon Hansson, formaður
Ásvegi 31, 760 Breiðdalsvík
Sími: 475-6648 
Fax: 475-6748
Skipaður af umhverfisráðherra.

Hafliði Sævarsson
Fossárdal,765 Djúpavogi
Sími: 478 8137
Tilnefndur af Búnaðarsambandi Austurlands

Fjölnir Torfason, bóndi
Hala Suðursveit.
Sími 478-1073
Tilnefndur af Búnaðarsambandi Austur-Skaftafellssýslu.

Þórunn Egilssdóttir
Hauksstöðum, 690 Vopnafirði
Sími: 4731469
Tilnefnd af Sambandi sveitarfélaga á Austurlandi

Áheyrnarfulltrúar

Skarphéðinn G. Þórisson, Náttúrustofu Austurlands
Tjarnarbraut 39 B, 700 Egilsstöðum
Sími: 471-2813/862-6774.

Starfsmaður

Jóhann G. Gunnarsson, Umhverfisstofnun
Tjarnarbraut 39 B, Egilsstöðum
Sími: 591-2000/822-4027

Tillaga Hreindýraráðs um skiptingu hreindýrahaga á Austurlandi í ágangssvæði

Ágangssvæði 2010

1. Vopnafjarðarhreppur
2. Jökuldalur auk Sellands, Blöndugerðis, Bótar, Flúða, Hlíðar, Heiðarsel og Skóghlíðar. Án Valþjófsstaðar- og Skriðuklausturslands sem liggur innan sveitarfélagsmarka Norður Héraðs.
3. Jökulsárhlíð utan við Selland.
4. Hróarstunga utan við Flúðir, Bót, Hlíð, Skóghlíð, Heiðarsel og Blöndugerði.
5. Fellahreppur.
6. Fljótsdalshreppur auk lands Valþjófsstaðar og Skriðuklausturs sem liggur í landi Norður Héraðs.
7. Borgarfjarðarhreppur.
8. Hjaltastaðaþinghá.
9. Eiðaþinghá og bæir inn að Eyvindará (Þuríðarstaðir, Dalhús, Miðhús, Steinholt og Eyvindará).
10. Vellir og jarðir innan Eyvindarár (Egilsstaðir, Kollsstaðagerði og Kollsstaðir).
11. Skriðdalur.
12. Seyðisfjörður og Mjóifjörður.
13. Norðfjörður og Eskifjörður.
14. Reyðarfjörður.
15. Breiðdalshreppur.
16. Djúpavogshreppur.
17. Lón (gamli Bæjarhreppur).
18. Nes (gamli Nesjahreppur).
19. Mýrar og Suðursveit (gamli Mýrar- og Borgarhafnarhreppur).

Mörk og númer veiðisvæða eru eftirfarandi eftir sveitarfélögum

Svæði 1. Vopnafjarðarhreppur og hluti Fljótsdalshéraðs, þ.e. Jökuldalur norðan Jökulsár á Brú og Jökulsárhlíð.

Svæði 2. Fljótsdalshreppur og hluti Fljótsdalshéraðs, þ.e. Jökuldalur austan Jökulsár á Brú, Hróarstunga, Fell, Vellir vestan Grímsár og Skriðdalur vestan Grímsár, Geitdalsár, Hrútár og línu úr Hrútárpollum í Hornbrynju.

Svæði 3. Borgarfjarðarhreppur og hluti Fljótsdalshéraðs þ.e. Hjaltastaðaþinghá og Eiðaþinghá.

Svæði 4. Seyðisfjörður, Mjóifjörður og hluti Fljótsdalshéraðs þ.e. Vellir austan Grímsár.

Svæði 5. Fjarðabyggð, þ.e. Eskifjörður, Norðfjörður og Reyðarfjörður.

Svæði 6. Breiðdalshreppur, sá hluti Fjarðabyggðar sem áður var Austurbyggð og hluti Fljótsdalshéraðs þ.e. Skriðdalur austan Grímsár, Geitdalsár, Hrútár og línu úr Hrútárpollum í Hornbrynju.

Svæði 7. Djúpavogshreppur, áður Beruneshreppur, Búlandshreppur og Geithellnahreppur.

Svæði 8. Hornafjörður, Lón og Nes - áður Bæjarhreppur og Nesjahreppur.