Afkoma Vatnajökuls
Afkoma Vatnajökuls
Umhverfisvísinn sýnir árlega afkomu Vatnajökuls, svo og heildarafkomu jökulsins, þ.e. breytingu á afkomu í heild frá því þessar afkomumælingar hófust árið 1992 til ársins 2005. Með afkomu er átt við aukningu eða minnkun á massa jökulsins.
Afkoma er ákvörðuð með því að mæla breytingar í þykkt og þéttleika (massa) jökulsins á völdum stöðum vor og haust. Niðurstöðurnar eru tengdar veðurfræðilegum aðstæðum (hita og úrkomu) til skamms tíma og sveiflum í loftslagi til lengri tíma.
Jöklar eru mjög næmir fyrir breytingum á hitastigi. Hlýnun andrúmsloftsins af völdum gróðurhúsalofttegunda ætti þess vegna fljótlega að koma fram í umfangi og stöðu jökla. Afkoman er reiknuð yfir í vatnssúlu jafndreift yfir allt yfirborð jökulsins. Línuritið sýnir stöðuga minnkun snjómassans eftir miðjan síðasta áratug. Þróun afkomu annarra jökla stefnir í sömu átt.
Heimild: Raunvísindastofnun, Helgi Björnsson og Finnur Pálsson
