Stök frétt

Svifryk við áramót nú sló öll met. Það var að mestu fyrirséð þar sem saman fór mikil flugeldasala, og spá um hægviðri.

Við Grensás í Reykjavík er mælt svifryk með tveim mælitækjum. Mælt er svokallað PM10 ryk (það er agnir sem eru minna en 10 mm í þvermál) og einnig PM2,5 ryk (agnir sem eru minna en 2,5 mm í þvermál).

Við áramótin sprengdi rykið mælikvarða tækjanna þannig að mælingin klukkan 01:00 er ekki marktæk. Rykið var það mikið að hefðbundin umferðarsveifla sést varla. Ryk frá uppsprettum öðrum en flugeldum og brennum var frekar lítið og andrúmsloftið hreinsaði sig mjög fljótt í kjölfar ryktoppsins. Þetta sést á því að strax klukkan fimm um morguninn var rykmagn orðið lágt miðað við árstíma.