Nokkuð hefur borið á því að undaförnu að aðilar sem taka að sér garðaúðun í atvinnuskyni bjóði jafnframt upp á það að úða gegn kóngulóm utan á húsum með sömu efnum og notuð eru til garðaúðunar. Samkvæmt reglum sem gilda um garðaúðun og reglugerð um meindýraeyða er ljóst að þeim sem hafa leyfi til garðaúðunar er ekki heimilt að bjóða upp á þess þjónustu.

Um starfssvið garðaúðara í Reglum nr. 238/1994 segir m.a. „Þeir einir mega stunda garðaúðun í atvinnuskyni sem til þess hafa leyfi frá Umhverfisstofnun. Með garðaúðun er átt við úðun trjáa og runnagróðurs gegn skordýrum“.

Um starfssvið meindýraeyða í reglugerð nr. 149/1989 segir m.a. „Sá einn má kalla sig meindýraeyði sem til þess hefur fengið leyfi Hollustuverndar ríkisins. Með meindýrum er átt við rottur og mýs annars vegar, og skordýr og aðra hryggleysingja hins vegar, sem valda tjóni eða umtalsverðum óhreinindum í eða við hýbýli manna, í peningshúsum, farartækjum, vöruskemmum o.s.frv.“